إكسبريس تيفي/بقلم يوسف السايسي الحسني
واحد نهار فشهر عشرة سنة 1969 تزاد الحسين عموتة بمدينة فقيرة فالمغرب سميتها الخميسات.. وسط عائلة من خمسة الخوت هو الصغير فيهم.. لكنه حسب الهدرة ديال باه كان هو المطور فيهم وزايدها راسو قاصح سوا فلعبوا سوا فقرايتو..
عموتة عشق الكرة من الصغر ومشا فيها لكنه عكس الأغلبية فداك الزمان بقا محافظ على قرايتو واستطاع يمزج بيناتهم بجوج.. حتا شد الباك ديالو ولعب فالفريق الأول ديال المدينة ديالو.. اللي هو الاتحاد الزموري للخميسات.. ومن تما الجمهور المغربي المهتم بالكرة بدا كيعرفو.
عموتة مكانش شي لعاب كبير بحال أبناء جيلو وداز شي مرات قليلة فالمنتخب سوا فالأولمبي أو الكبار.. لكن الجميع عرفوا غيكون عندو مستقبل كبير فالضومين خصوصا فاش كال لصحابو اللي لعبو معاه أنه غيمشي لمجال التدريب.. وتما الجمهور غادي يبدا يعرفو تاع بصح ويعرف “الكراكطير” ديالو اللي تشهر بيه.. اللي راسو مالو: المعقول تم المعقول تم المعقول.
عموتة بدا التدريب بفرقة مدينتو الاتحاد الزموري للخميسات باش يبان فالسوق.. ورغم قلة الإمكانيات إلا أنه استطاع ينافس الوداد والرجاء والجيش فالتوقيت اللي شد فيها الفرقة ودار الضجيج لشي بعضين بل إنه سنة 2005 جا الثاني فالبطولة وأهل فرقتو لعصبة الأبطال فواحد من أجمل ذكريات مدينة الخميسات الرياضية.
من بعد داكشي اللي دار مع الخميسات سمية زاد كبرات ديال عموتة ومشا الفتح الرباطي فرقة العاصمة وتما يمكن كانت أول البوادر ديال مدرب كبير جاي، حيث استطاع بلاعبين عاديين يفوز بكأس العرش وكأس “الكاف”.. قبل ما يهز حوايجو ويمشي لقطر وما أدراك ما قطر ليصبح مدير رياضي على نادي السد قبل ميولي مدرب ديال الفرقة اللي كان فيه العاليم ديال البارصا تشافي هيرنانديز.
سنة 2017 سعيد الناصيري رئيس الوداد عيط لعموتة كال ليه بغيتك فبريكول مع الحمرة.. ومكاين اللي غيكد عليه قدك.. كال ليه أشنو هو: جاوبو الرئيس بأنه باغي يدي عصبة الأبطال الإفريقية اللي حمقات الناصيري بـ”فلوسو”.. عموتة مع مولف تسافير كال ليه مرحبا هاني جاي للمغرب نشوفو هاذ لفيلم.
العام اللول ديال عموتة مع الوداد ضرب معاها العصبة وزاد الناصيري كادو ديال لقب البطولة.. كأول مدرب مغربي يحقق ذلك.. تما البورصة ديالو تفركعات عند المغاربة.. هو يتوجه ليه مول البالون فوزي لقجع، وعطاه المنتخب المحلي اللي تا هو معطلوش وجاب بيه كأس إفريقيا للمحليين من قلب الكاميرون.. قبل ميخرج من ربع نهائي كأس العرب مع “دزاير” في ربع نهائي كأس العرب التاريخي بقطر.
عموتة بغا الراحة قبل المونديال الأخير.. السيد مشا رتاح مع راسو قبل ميجيه عرض من الاتحاد الأردني لكرة القدم.. بعدما بداو الخليجيين يقلبوا على وصفة مماثلة لوليد الركراكي اللي دار إنجاز فقطر، من تما الأردنيين وصاوهم شي مغاربة وقطريين عشرانهم بالحسين عموتة كأفضل اختيار.
عموتة كعادة بدايتو فأي بلاصة كيمشي ليها.. مكتكونش مزيانة.. بداها بالخسران مع الأردنيين وتزاد عيلها الضغط.. لكن السيد كان عارف أش باغي.. لأنه فاش بدا الصح وانطلقات كأس أسيا الحالية.. ولد الخميسات سكت كولشي.. وبات محبوب الأردنيين وهو اللي وصلوهم لنهائي كأس اسيا في واقعة معمروهم مع عاشوها وموحالش يعيشوها ديما فالمناسبات الجاية.
