إكسبريس تيفي/✍نجيبة جلال:
يبدو أن خط تحريرنا قد أغضب الكثير ممن استغلوا سذاجة بعض المتابعين على القنوات الفيسبوكيةً و اليوتوبية، و يبدو أننا رفعنا الحجاب عن الكثير من الممارسات التي امتهنها بعض عبيد الادسانس و من يسخرهم لأهداف مسيئة أولا للمناخ المجتمعي و أيضا لما نراه معاديا لوطننا الحبيب.
كنا نعرف أن هناكً متضررين كثر سيطفون على السطح و يخرجون من جحورهم، وًنحن لسنا أبدًا بمتفاجئين من محاولات الضغط التي تعرضنا لها بصفة مباشرة في تعليقات أو عبر الهاتف و لا حتى تلك المحاولات البئيسة لتشويه السمعة في تدوينات أو مقالات و ربط ما نقوم به بحسابات شخصية.. بالعكس، فخرنا كبير، لأن المتضررين من خطنا التحريري هم من انفضح أمرهم و هذا ما كنا نسعى اليه بالضبط !
نعم ، فإلى جانب وجوه_اليوتوب داخل أو خارج المغرب، اولائك الذين يدعون محاربة الفساد، و منهم من ذهب إلى أبعد الحدود ووصل حد السب و القذف في رموز الدولة، و هناك أيضا من يدعون الدفاع عن حقوق الانسان و هم في الواقع يفبركون ملفات حقوقية و هناك من هم في الخفاء، يشتغلون في المقاهي و يؤججون الاوضاع بنشر أخبار و معلومات لا أساس لها من الصحة.
مني وقفنا شوكة في حلق العديان، بداو شي وحدين كيحاربونا و ما فهمناش علاش، و كاين لي حاول يضغط علينا باسم الصداقة باش نحبسو كتاباتنا و كاين لي قالينا صراحة ان الاختيار التحريري ديالنا غادي يخلق لينا عداوات …..
حنا اختيارنا كان واضح من الأول، نفضحوا شبكات الفساد من وسط بلادنا ، و نثيقوا في مؤسساتنا و في الدولة و بنفس الشراسة، نفضحوا تناقضات من يدعون محاربة الفساد من خارج الوطن و لي غالبا الغرض من حملاتهم ماشي هي الكبدة على البلاد بل تنزيل لخطط جهات معادية للمغرب، و كيستعملو أخطاء أشخاص مفسدين باش يضربو في صورة المغرب الحقوقية…
بالواضح و بلا زواق ، الا عندنا ناس فاسدين فهذا ما كيعنيش أن الدولة هي لي مسؤولة على فعايلهم ، لان رجالات البلاد، مني كيوصلهم شي ملف كيتخذوا الاجراءات، و داكشي علاش ما يمكنش لينا نسمحوا ان شي واحد يستغل اخطاء مواطنين دخلوا للسياسة او تمكنوا من مناصب باش يتهموا البلاد و من واجبنا نفضحوهم !
و التنوعير ديال هاذ الناس باين، اي ملف كيستعملوه باش يتهموا الملك و المستشارين و الحموشي و المنصوري، في حين أن في الواقع كتلقاه غير شي مسخوط الوالدين أو شي متسلقة استفادت من تكافؤ الفرص فهاذ البلاد و شد أو تمكنات من شي منصب أو موقع و خدامين كينصبوا و يسخسخوا في العباد.
أما التنوعير ديال ذوو الوجهين، فحتى هو ما بقى خافي على حد،
الاشخاص لي باقي عندهم أحلام القومة تصاحبوا مع مالين أحلام اليسار المتطرف و كيضربوا من لتحت، و هوما لي كيغطيوا على شبكات الفساد لأن المغرب بالسرعة لي غادي بيها، أجهض كل أحلامهم بأن يصلوا للحكم يوما… هوما نفسهم لي فين ما كان شي مغتصب أو شي منحرف جنسي كيساندوه و يقولك المخزن لي دارها ليه ….
المغرب بخطة طريقه أبان للعالم أن الايديولوجيات ما كتبنيش البلدان، يمكن تصنع بها سياسيين و لكن صعيب تكون عندها استراتيجية النهوض بدولة أو حتى بقطاع!
و هاذ التقارب بين اصحاب القومة و اليسار المتطرف و تقربهم من أجنحة الفساد ربطوا علاقة مبنية على “حميني و أنا نغطي عليك ، و نهار شي واحد فينا يحصل الجماعة تغلب السبع”!!!
و لكن هيهات، السبع عندو رعاياه، و مهما كثر عددكم و أجنحتكم، كيبقى السبع رمز الاستقرار و نسور البلاد ما غاديش تعرفوا امتى غادي يطيحوا عليكم….
إلى ذلك الحين، حنا ماغاديش نبدلوا خطنا التحريري، و كل ما بان لينا الفساد غادي نفضحوه…و تدويناتكم أو مقالاتكم كنديروها في خانة محاولات الضغط التي تحفزنا باش نزيدوا نفضحوكم.
