إكسبريس تيفي /نجيبة جلال :
ادريس الراضي و اسماء بوعشرين …..واش بغيتو الحجا ولا منين جا؟
حجاية اصحاب “الطابور الخامس” صيدات شحال من واحد، كل ما خرج علينا واحد من البراحة ديالهم بشي قصة حتى كتلقى المتلقين كينقسموا…
كاين لي كيعجبو الكذوب، و كيبغي يستمع ليه بحال شي خرافة و لكن ما كيديرش فيه راسو… يعني بحال الا كيتفرج في مسلسل” سانتا باربارا” و القصة كتحبس تما، و كاين لي كيدخل في السيناريو و كيولي حتى هو من الشخصيات ديال المسلسل….
هكذا وقع لابطال الفايسبوك و اليوتوب و تويتر، النهار الاول، خرج لمرابط و زيان و المعطي منجب و صنعوا سيناريو و اشتغلوا على الترويج ديالو…. كلنا شفنا داك العجب، انا مثلا ، لمرابط بان ليا من الديبار زانزان ، و زيان شارف مكبوث .. و المعطي بزناس باغيها تنوض باش الفليسات لي ضارب ما يصدرش فيها حكم و يتحجز عليهم ….
و لكن كاين لي مشاو مع الحجاية، و مشاو بمبدأ : واش كتعرف العلم، قالو لا كنعرفو نزيدو فيه…..و من ثما بدات الحكاية….و بدا اي ملف كيتعرض على القضاء، كيحاولو يتقربو من الاشخاص و يدخلوهم في السيناريو و يصنعوا ليهم ادوار…..
بدات القصة بتوفيق بوعشرين ، المحاكمة ديالو كانت الامور فيها واضحة، و لكن زيان خاصو يلعب و يلقى ” عيالات” يتبربص عليهم في الطريق…. الزوجة ديالو مشات فبلان التصعيد لان قنعوها ان هذاك هو الحل باش توفيق ما تبقاش محسوبة عليه انه استغل نساء اشتغلوا معاه… تذكروا معايا البنت لي لقاو فالكوفر ديال السيارة ديال ولد زيان…. واش ماشي سيناريو دفيلم؟
من بعد توبع سليمان في ملف محاولة اغتصاب واحد الشاب لي جابتًوً الزوجة ديالو خلود حتى للدار ، سليمان نكر انه كيعرف اصلا الضحية في الاول و لكن الضحية كان عندو اوديو فيه صوت سليمان يتوسل اليه ما يقول حتى حاجة و بغا يعطيه الفلوس باش يسكت، هاذ الاوديو لي سليمان رفض الخبرة ديالو …. اضف الى ذلك ان لي كيعرف سليمان يعرف انه في علاقته مع واحد السيدة قبل من خلود ، كان كيعنفها امام الملأ و هادشي بشهادة رفاق الكأس و القصارة…
من بعد خرج ملف عمر الراضي ، لي الاصدقاء لي كيجالسوه في موائد السهر اعترف ليهم من الديبار انه قام بفعلته و قال ليهم ” اغتصبت المخزن” …..طبعا هادشي كلو ما قالوهش في الاعلام لان المحاكمة لا تستند على القيل و القال، القاضي كيستمع للاوديوهات ، و التسجيلات و كيقوم بالخبرة التقنية على الهواتف….و لكن هادشي كلو هضرة دايرة و كلشي عارفها….
طبعا بعد المحاكمات لي اصحاب السيناريو استقطبوا فيه الزوجات و الوالدين و قالوا في الضحايا ما لا يستطيع انسان عاقل يقولوا… و ربطوا الاتهامات باستهداف من الدولة ، جات العقوبات السجنية التي صاحبتها تدوينات، و عيدميلاد اعتقالات و جوائز وهمية ….
الحجا هو هذا ولكن منين جا….
لن اخاطب خلود المختاري لان هدفها باين ماشي هو راحة سليمان، و حين المحاكمات و من بعدها خلود كانت ديما 5/5 ما ماشي بحال اي زوجة مغربية راجلها في السجن… همها تبان و دبر على راسها، لانها اصلا كانت عارفة راسها شادة سليمان غير بزز…و لي بغا يفهم الفرق بين خلود و اسر السجناء الاخرين، يشوف صور خلود في الفايسبوك و الحوارات ديالها واش باين عليها كرام ديال الفقصة على سليمان.
و لكن بالنسبة لادريس الراضي و زوجته او اسماء مساوي كنقولهم ان توفيق او عمر عندهم ضحايا، و اي اسرة مغربية كانت في مكانهم ستفاوض من اجل الحصول على تنازلات… التصعيد لي كيقوموا ليه في صالح ” الطوابرية” لي لا يهمهم لا عمر و لا والديه و لا يهمهم توفيق و لا اطفاله ….
العقل و المعقول هو ان السيد ادريس الراضي و اسماء بوعشرين الاجدر بهم ان يسعوا الى طلب التنازلات و التوجه الى سلوك مسطرة طلب العفو، لان العفو مرتبط في المسطرة باصدار طلب من طرف الاسرة او ادارة السجون اوً النيابة العامة و لكن كيفما اتى في القانون ، لا يمكن ان يلحق العفو في اي حال من الاحوال ضررا بحقوق الغير….و هادشي هو اي اي اسرة مغربية كانت ستحاول القيام به…
الحجا اسي دريس هو هاذ التدوينات و التصعيدات الخاوية لي كيدفعوكً ديرها، الطريق باينة و كيفما قالو لوالا:
اذا كان حمارك مشاي.. لا تقوى عليه بالتخنيص.
